Los Laga Bai Presents:

“TRUPIALNAN DI ARIKOK”

Durante Carnaval 54 Los Laga Bai presentando e “Bailadonan di Solo”den un forma incomparabel a rindi homenaje na nan banda Robert Jeand’or y su Solo Banda Show pa nan 15 anja di animacion musical. E aprecio y elogio ricibi tabata hopi grandi y e premiashonnan ta papia pa nan mes: Los Laga Bai un biaha mas a wordo escohi como “Grupo mas Anima” na San Nicolaas y Oranjestad y Robert Jeand’or y Su Solo Banda Show merecidamente ta titula nan mes “Banda di Anja”.

Pa Carnaval 55 Los Laga Bai a opta pa extende e anja cultural 2008 pa 2009 y a inspira su mes un biaha mas door di naturalesa Arubano. E biaha aki ta un idea di sr. Raoul du Puy, cu un trayectoria di basta anja den Los Laga Bai como participante, ta sirbi como base pa e disfraz cu Los Laga Bai lo subi caminda cune den Carnaval 55.

Nos Trupial Arubano sigur ta un di e parhanan mas caracteristico di nos isla. Su canto singular ta un di e prome sonidonan cu por wordo scucha mainta tempran na salida di solo. Cu su plumanan di colornan llamativo e Trupial ta forma un bunita bista ora cu e aparece riba cadushinan of matanan sea den nos parke nacional Parke Arikok of cualkier otro kunuku y te hasta na nos casnan pa come fruta y insecto.

2008-07-25-presenting-trupiaal

Bou di e nomber: “TRUPIALNAN DI ARIKOK” Los Laga Bai ta presenta un disfraz sumamente yamativo y dinamico den e colornan Oranje, Preto y Blanco cu accentonan den Plata confecciona den e telanan di Lamé y Organza cu ta transforma cada participante di Los Laga Bai den e simbolo aki di nos fauna Arubano esta nos Trupial crioyo. E fantasia y creatividad inigualabel di nos participantenan lo refleha e mahestuosidad di e parha aki den un cuadro cultural y di e manera unico cu ya pa 27 anja Los Laga Bai ta conoci pe y cu e pueblo carnavalesco a bin di spera di nos. Tur esaki naturalmente bou di e acompanjamento musical di nos ‘house band’ pa di 16 anja consecutivo y na mes momento Banda di Anja di Aruba su Carnaval 54: Robert Jeand’or y Su Solo Banda Show!

Den un vuelo di colornan Oranje, Preto y Blanco e TRUPIALNAN DI ARIKOK lo deleita e pueblo carnavalesco, tanto esnan na cas como tambe esnan para na banda di caminda, cu nan gozo y alegria manera nan a bin ta spera di Los Laga Bai, gradiciendo un y tur pa nan apoyo y demostrando un biaha mas dicon nan ta e indiscutibel reynan di ambiente.

Danki Aruba!

© 2019 Los Laga Bai. All Rights Reserved