Despues di un celebracion di plata durante Aruba su Carnaval 53 na unda Los Laga Bai cu su “Cascabelnan di Fortuna” a demonstra un biaha mas cu nan ta e indiscutibel reynan di ambiente durante e paradanan di carnaval, e aña aki Los Laga Bai ta sigui di fiesta cu e BAILADONAN DI “SOLO”.
Pa Carnaval 54 Los Laga Bai ta bolbe marca un momento historico den su trayectoria carnavalesco. Ta 15 aña pasa, 1994 pa ser exacto, cu pa prome biaha cu Los Laga Bai y Sr. Robert Jeandor y su Solo Banda Show a jega na un acuerdo dunando asina inicio na un colaboracion musical y ambientoso sin igual den Aruba su mahestuoso carnaval.
Durante e trayectoria largo aki di 15 aña di acompañamento musical na e participantenan di Los Laga Bai, Robert Jeandor y Su Solo Banda Show a wordo galardona na tres occasion cu e titulo maximo di BANDA DI ANJA. Na 2002 acompañando ‘The Steelband Dancers’, na 2005 dirigiendo e ‘Piratanan na Boca Grandi’ y ultimo na 2007 deleitando e ‘Cascabelnan di Fortuna’.
Considerando e ariba menciona no tabata dificil pa escohe e tema di Los Laga Bai. Organisadornan y participantenan tur tabata di acuerdo pa tuma Robert Jeandor y Su Solo Banda Show como e inspiracion pa e kostuum di Carnaval 2008. Basa riba un idea di un participante di Los Laga Bai, sra. Barbara Brown, a diseña e kostuum pa e: ‘BAILADONAN DI “SOLO”.
Cu un fantasia den e colornan primario: Blauw, Geel y Cora, Los Laga Bai kier a capta y presenta e fenomeno cu yama Robert Jeandor y Su Solo Banda Show. ‘Royal Blue’ ta e color principal ya cu nada menos cu un color intenso y royal por refleha e grandeza di nos ‘house band’ y e compromiso cu Los Laga Bai tin cu Robert Jeandor y Su Solo Banda Show. E color blauw na mes momento tambe ta refleha e logronan di Robert Jeandor y Su Solo Banda Show atravez di awanan Caribense. Imprimi riba e tela nos ta hanja e simbolonan di e banda esta e “Solo” briyante den e colornan geel y cora y “Notanan Musical” den color geel/oro. E “Solo” y “Notanan Musical” den e color geel briyante ta simbolisa e calor, vibracion y forza creativo di un banda cu semper a toea 100% live na deleite di tur participante di Los Laga Bai y e pueblo carnavalesco para banda di caminda cu semper a sa di respalde cu nan aplauso bon mereci.
Na mes momento Los Laga Bai ta haci un jamado na tur su fiel participantenan pa haci bon nota cu dia 1 di december 2007 venidero lo start cu inscripcion. Esaki lo tuma lugar na Centro Kibrahacha na Piedra Plat cuminsando pa 10’or di mainta te cu 4’or di atardi. Prijs pa participa lo ta Awg. 525 pa participante y manera ta custumber lo pidi un ‘down payment’ di Afl. 250,- . E suma aki ta consisti di Afl. 100,- pa inscripcion y Awg. 150,- pa material pa e disfraz. Los Laga Bai ta participa cu lugarnan ta limita y por lo tanto esun cu yega prome lo bebe awa dushi. Asina ta un y tur cu kier participa cu Los Laga Bai den Carnaval 54 como un di e “BAILADONAN DI SOLO” asisti sin falta dia 1 di december 2007 na Centro Kibrahacha pa 10’or en adelante y sigura nan participacion cu un di e gruponan di carnaval di mas ambiente celebrando e di 15 aniversario di Robert Jeandor y Su Solo Banda Show como e ‘houseband’ di Los Laga Bai.